پەیامی هاوبەشی یەکەیتی لاوانی دێموکراتی روژهەلاتی کوردستان ویەکەیتی ژنانی دێموکراتی کوردستان لە نۆروێژ

ئەمرۆ ٧٠ ساڵ بەسەر دامەزراندنی یەکەم کۆماری کوردستان کە لە سەر بنەمای کۆمەلی ژکاف دا دامەزرا تێدەپەرێت، کۆمارێک کە ١١ مانگی خایاند، بەڵام هەتاکوو ئێستاش و نەوەکانی داهاتووش لەهەر چوارپارچەی کوردستان بە بەرهەمەکانی بەرز رادەگرن. هاوڕێیان! ئەگەر ئاوڕێکی لە وتارەکانی پێشەوامان قازی محەمەد لە رۆژنامەی کوردستان بدەینەوە، بەروونی دەردەکەوێت، کەمەبەستی حزبی دیموکراتی کوردستان و پێشەوا لەو کۆمارە، دەوڵەتی سەربەخۆی کوردستان بووە. نیشتمان لای کۆماری کوردستان تەنانەت سنووری رۆژهەڵاتی کوردستانیش دەبرێت روو لە هەموو پارچەکانی دیکەی کوردستان دەکا. هاوڕێیانی خۆشەویست! ٧٠ساڵ لەمەوبەر کۆماری کوردستان لەگەڵ هەموو بەها نەتەوەییەکانی، کۆمارێکی دێموکرات بوو. باس لەو هەموو دەستکەوتە فیکری و کلتووری و کۆمەڵاتیی و هونەریانەی کۆمار ناکەین، هەر ئەوەندە دەلێین کە هەموو کوردستان و بگرە ناوچەی رۆژهەڵاتی ناوەڕاست بەگشتی و بەشێک لە ئورووپای شەرقی ئەوکاتیش لەسەر دوو چەمکی "ژن" و "لاوان" قەرزداری کۆماری کوردستانە. ژنان لەکۆماری کوردستاندا مافی خوێندن و بەرێوەبەریان هەبوو، بەدڵنیاییەوە ئەگەر گەلەکۆمێی دوژمنان رێگەیدابا وکۆمار بەردەوام با، ژنان لەهەڵبژاردنەکاندا نەتەنیا هەر مافی دەنگدانیان دەبوو، بگرە مافی خۆپاڵاوتن بۆ هەموو پۆستەکانیشیان دەبوو، چونکە لەو ١١ مانگەی کۆماردا کارێکی زۆر بۆ خوێندنی ژنان کرا، هەندێک نەریتی کۆنی وەکوو ژن بەژنێ قەدەغەکرا، هاوکاتیش ژنان پەروەردەی سەربازیشیان دەبینی و بۆ بەکردارکردن و بەدواداچوون بۆ ئەوانەش یەکێتی ژنان دامەزرا، لەو سەردەمەدا ئەوە دەستکەوتێکی جیهانی بۆ یەکسانی بوو، چونکە ئەوکات بەریتانیا هەر چەند ساڵ دەبوو مافی دەنگدانی بەژنان دابوو و هەندێک وڵاتی پێشکەوتووی ئێستا، ئەوکات نەک هەر رێکخراو و سەندیکای تایبەت بە ژنانیان نەبوو، بگرە ژنان خۆیان هیچ مافێکی ئەوتۆی رۆژانەشیان نەبوو. لەلایەکی دیکەشەوە دامەزراندنی یەکێتی لاوان لەسەردەمی کۆماری کوردستاندا زۆر واتادار بوو، واتای بەردەوام لەجووڵەدابوونی کۆمەڵگا و پەروەردەی نەوەی نوێ بۆ داهاتووی گەل و نیشتمان و ئامادەکردنی کادری لاو بۆ ئەوەی لەداهاتوودا خاوەندارێتی کرداری لەکۆمارو دەستکەوتە نەتەوەیی و دیموکراتییەکانی بکەن.ئەو کاریگەرییەی کۆماری کوردستان لەسەر لاوانی کوردستانی دانا، وایکرد کە هەر ئەو لاوانە دوای چەندین ساڵ هەر لەسەر ئەوبنەمایە حزبی دیموکراتی کوردستان ببوژێننەوەو، بەڵێنیش بدەن کە هەر نەوەکەی جارانی کۆمارو پێشەوان. بەشداربووانی بەڕێز دوای ٧٠ لە کۆماری کوردستان ،هەنووکە رێژیمی ئێران لەناوخۆدا تووشی سەدان و بگرە هەزاران قەیران هاتووە و رێژیم وەک سیاسەتی هەمیشەیی خۆی و بۆ شاردنەوەی ئەم کێشە نێو خۆییانەی، دەستی کردوە بە ئاژاوەگێڕی لە رۆژهەڵاتی نێوەڕاست و ئیدعای سنوورداری تا دەریای مەدیتەرانە دەکات. بەڵام بە هەموو ئەو خەونانەی کە بۆ درێژ کردنەوەی دەسەڵاتە دژی گەلییەکەی خۆی دەیبینێ، ئێستاش بەدەست رۆڵەکانی دێموکراتەوە زەبوونە و رێژیمێک کە پێی وایە حاکم و سەرداری رۆژهەڵاتی نێوەڕاستە، بەدەیان جار لەلایەن خەڵکی رۆژهەڵاتی کوردستانەوە ئەو پەیامەی وەرگرتووە کە نەیتوانیوە لە کوردستان ئەو حاکمیەتەی بچەسپێنێت ،حیزبی دێموکراتی کوردستان و خەڵکی روژهەلاتی کوردستان ئەو پەیامەیان دایەوە بە کۆماری ئیسلامی کە هیچ دەسەڵاتێک ناتوانی لە رۆژهەڵات پرسی کورد بەلاڕێدا ببات و پرسی کورد چەواشە بکات ئەرکی ژنان و لاوانی رۆژهەڵاتە کە لەبەرامبەر وەزعی مەوجود تەسلیم نەبن و دۆخی بێ تەفاوەتی و بێ خەیاڵی قەبووڵ نەکەن و هەروەها ئەرکی خەباتکارانی کوردە کە بە کەڵک وەرگرتن لە هونەری گواستنەوەی دەرفەت و هەلەکان بە قازانجی بزوتنەوەی رۆژهەڵات، درێژە بە تێکۆشان بدەن و تا گەیشتن بە دوا وێستگە و ئامانجی شەهیدان بەردەوام بن هاورێیان بەرێز ژنان و لاوانی رۆژهەڵات دەبێ بەردەوام لەسەر سێ بنەما پەیمانی خۆیان لەگەڵ کۆماری کوردستان نوێ بکەنەوە. یەکەم: نابێ هەرگیز خەونی پێشەوامان و کۆمار بۆ دەوڵەتی کوردی لەرۆژهەڵاتی کوردستان لەبیربکەین، بۆ ئەو ئامانجەش خۆڕێکخستنەوەی لاوان و ژنانی پارێزەر لەناوخۆی وڵات پێویستییەکی مێژوویی و ئەرکێکی نەتەوەیی و نیشتمانییە. دووەم: ئەو کۆمارە بەیەک حزبی دێموکرات دامەزرا و واتا راستەقینەکەشی هەر بەو یەکدەنگی و یەک دێموکراتییە مانای دەبێت، دەبێ لاوان و ژنان دوای تێپەربوونی ٧٠ ساڵ بەسەر دامەزراندنی کۆماری کوردستاندا پێداگربن لەسەر یەکگرتنەوەی ناوماڵی حزبی دێموکراتی کوردستان لەسەر بنەمای کۆماری کوردستان و حزبی دێموکراتی ئەو سەردەم. سێیەم: ئەخلاقی سیاسیی بنەمای کۆماری کوردستان و سەرۆکەکەی بوو، هەربۆیەش نابێ هیچکات و لەهیچ چرکەساتێکدا لەبیری بکەین کە ئێمە درێژەپێدەری کێ و پەروەردەکراوی چ مەکتەبێکین. نەمری بۆ شەهیدانی رێگای رزگاری کوردو کوردستان سەرکەوێ خەباتی رەوای نەتەوەی کورد بەرز و پیرۆز بیت ٢ی رێبەندان یەکیەتیی ژنانی دێموکڕاتی کوردستان یەکیەتیی لاوانی دێموکڕاتی رۆژهەڵاتی کوردستان لە نۆروێژ ٢ی رێبەندان ٢٧١٦